नेपाल पूर्वाधार 
काठमाडौं। प्रधानमन्त्री बालेन्द्र शाहको आसन्न भारत भ्रमणको तयारीका लागि नेपाल आएका भारतीय विदेश सचिव विक्रम मिश्रीले परराष्ट्रमन्त्री शिशिर खनालसँग भेटवार्ता गरेका छन्।
बुधबार बिहान काठमाडौं आइपुगेका मिश्रीले आगमनलगत्तै परराष्ट्र मन्त्रालयमा मन्त्री खनालसँग शिष्टाचार भेट गरेका हुन्। भेटमा नेपाल-भारतबीचको ऐतिहासिक सम्बन्धलाई थप सुदृढ बनाउने तथा द्विपक्षीय सहकार्य विस्तार गर्ने विषयमा छलफल भएको परराष्ट्र मन्त्रालयले जनाएको छ।
मन्त्रालयका अनुसार भेटका क्रममा दुई देशबीच रहिआएको बहुआयामिक साझेदारीलाई थप गहिरो बनाउने, आपसी सम्बन्धका विविध पक्षमा सहकार्य बढाउने तथा साझा हितका विषयमा सहयोग विस्तार गर्नेबारे कुराकानी भएको थियो।
प्रधानमन्त्री शाहको आसन्न भारत भ्रमणको तयारीलाई केन्द्रमा राखेर भारतीय विदेश सचिव मिश्री नेपाल आएका हुन्। उनको भ्रमणलाई प्रधानमन्त्रीको भारत भ्रमणको एजेन्डा, तयारी र दुई देशबीचको उच्चस्तरीय कूटनीतिक संवादका दृष्टिले महत्त्वपूर्ण मानिएको छ।
मिश्रीले नेपाल भ्रमणका क्रममा परराष्ट्र सचिव अमृतबहादुर रायलगायत उच्च सरकारी अधिकारीहरूसँग पनि भेटवार्ता गर्ने कार्यक्रम रहेको छ।
नेपाल र भारतबीच राजनीतिक, आर्थिक, व्यापारिक, ऊर्जा, पूर्वाधार तथा पारवहनलगायतका क्षेत्रमा बहुआयामिक सम्बन्ध रहँदै आएको छ। पछिल्लो भेटवार्ताले यी क्षेत्रमा आपसी सहकार्यलाई थप गति दिने अपेक्षा गरिएको छ।
