नेपाल पूर्वाधार 
काठमाडौं। नेपाल प्रिमियर लिग (एनपीएल) को तेस्रो संस्करण खेल्न दक्षिण अफ्रिकाका चर्चित क्रिकेटर डेभिड मिलर नेपाल आइपुगेका छन्।
मिलर आज बिहान त्रिभुवन अन्तर्राष्ट्रिय विमानस्थलमा अवतरण गरेका हुन्। उनलाई एनपीएल टोली कर्णाली याक्सका प्रतिनिधिले विमानस्थलमा स्वागत गरेका थिए। उनी पहिलोपटक नेपाल आएका हुन्।
कर्णाली याक्सले यस संस्करणका लागि विदेशी खेलाडीका रूपमा मिलरलाई टोलीमा अनुबन्ध गरेको हो। सीमित ओभरको क्रिकेटमा आक्रामक ब्याटिङ र दबाबपूर्ण परिस्थितिमा उत्कृष्ट प्रदर्शन गर्ने क्षमताका कारण उनी विश्व क्रिकेटमा परिचित छन्।
३७ वर्षीय बायाँहाते ब्याटर मिलरले दक्षिण अफ्रिकाका लागि १४० टी-२० अन्तर्राष्ट्रिय खेल खेल्दै २ शतक र ९ अर्धशतकसहित २ हजार ८०४ रन बनाएका छन्। त्यस्तै, १८० एकदिवसीय अन्तर्राष्ट्रिय खेलमा ८ शतक र २४ अर्धशतकसहित ४ हजार ७६२ रन बनाएका छन्।
समग्र टी-२० क्रिकेटमा पनि मिलरको प्रदर्शन प्रभावशाली छ। उनले विभिन्न घरेलु तथा फ्रेन्चाइज प्रतियोगिताका ५८४ खेलमा ४ शतक र ५३ अर्धशतकसहित १२ हजार ४३५ रन बनाएका छन्।
इन्डियन प्रिमियर लिग (आईपीएल) मा पञ्जाब किङ्स, राजस्थान रोयल्स, गुजरात टाइटन्स र दिल्ली क्यापिटल्सबाट खेलिसकेका मिलर सन् २०२२ मा गुजरात टाइटन्सले पहिलोपटक उपाधि जित्दा टोलीका महत्वपूर्ण सदस्य थिए।
उनले सन् २०१७ मा बङ्गलादेशविरुद्ध ३५ बलमै टी-२० अन्तर्राष्ट्रिय शतक प्रहार गरेका थिए। यो प्रदर्शनले उनलाई विश्व क्रिकेटका विस्फोटक ब्याटरमध्ये एकका रूपमा स्थापित गरेको थियो।
मिलरको आगमनसँगै कर्णाली याक्सको ब्याटिङ लाइनअप थप बलियो हुने अपेक्षा गरिएको छ। उनको अनुभव र आक्रामक शैलीले एनपीएलको प्रतिस्पर्धालाई थप रोमाञ्चक बनाउने देखिन्छ।
तेस्रो संस्करणको एनपीएल कात्तिक ९ गतेदेखि कीर्तिपुरस्थित त्रिभुवन अन्तर्राष्ट्रिय क्रिकेट मैदानमा सञ्चालन भइरहेको छ।
