नेपाल पूर्वाधार 
काठमाडौं। वीरगञ्जस्थित नारायणी अस्पतालमा सुलभ फार्मेसी सञ्चालनमा आएको छ। स्वास्थ्य तथा खाद्य स्वच्छता मन्त्री निशा मेहताको निर्देशनअनुसार सहुलियत दरमा गुणस्तरीय औषधि उपलब्ध गराउने उद्देश्यले यो सेवा सुरू गरिएको हो।
नेपाल सरकारको मन्त्रिपरिषद्ले २०८२ चैत १३ गते स्वीकृत गरेको शासकीय सुधारसम्बन्धी एक सय कार्यसूचीअन्तर्गत बुँदा नम्बर ८५ (घ) अनुसार सरकारी अस्पतालमा सुलभ फार्मेसी सञ्चालन तथा विस्तार गर्ने कार्यक्रम लागू गर्दै नारायणी अस्पतालले यो सेवा शुरू गरेको स्वास्थ्य तथा खाद्य स्वच्छता मन्त्रालयले जनाएको छ।
मन्त्रालयका अनुसार सुलभ फार्मेसी सञ्चालनमा आएपछि अस्पतालमा उपचारका लागि आउने बिरामीले आवश्यक औषधि बजार मूल्यभन्दा सहुलियत दरमा अस्पतालबाटै सहज रूपमा प्राप्त गर्न सक्नेछन्। यसबाट उपचार खर्च घट्नुका साथै गुणस्तरीय औषधिमा सर्वसाधारणको पहुँच थप विस्तार हुने अपेक्षा गरिएको मन्त्रालयको भनाइ छ।
यसैबीच, नारायणी अस्पतालमा क्याथ ल्याब मेसिन जडान गर्ने कार्य पनि सुरू भएको मन्त्रालयले जनाएको छ।
मन्त्रालयले शासकीय सुधार कार्यसूचीअनुसार देशभरका सरकारी अस्पतालमा चरणबद्ध रूपमा सुलभ फार्मेसी सञ्चालन तथा विस्तार गर्ने कार्यक्रमलाई अघि बढाइरहेको जनाएको छ।
