नेपाल पूर्वाधार 
वीरगञ्ज। मुलुककै प्रमुख व्यापारिक नाका वीरगञ्ज भन्सार कार्यालयले चालु आर्थिक वर्षको पहिलो ११ महिनामा रु २ खर्ब २१ अर्ब ७८ करोड राजस्व सङ्कलन गरेको छ। यो रकम गत आर्थिक वर्षको सोही अवधिको तुलनामा रु १७ अर्ब ९७ करोड अर्थात् करिब नौ प्रतिशतले बढी हो।
भन्सार कार्यालयले चालु आवका लागि रु २ खर्ब ४९ अर्ब १९ करोड राजस्व सङ्कलन गर्ने लक्ष्य पाएको थियो। हालसम्मको सङ्कलन लक्ष्यको ८९ प्रतिशत बराबर रहेको कार्यालयले जनाएको छ।
कार्यालयका सूचना अधिकारी उदयसिंह विष्टका अनुसार गत आर्थिक वर्षको ११ महिनामा रु २ खर्ब ३ अर्ब ८१ करोड राजस्व सङ्कलन भएको थियो। चालु आवमा आयात तथा व्यापारिक गतिविधि बढेसँगै राजस्व सङ्कलनमा पनि वृद्धि भएको उनले बताए।
चालु आवमा सबैभन्दा बढी चैत महिनामा रु २२ अर्ब ८२ करोड र जेठमा रु २२ अर्ब ३२ करोड राजस्व सङ्कलन भएको छ। वैशाखमा रु २१ अर्ब ७४ करोड, मङ्सिरमा रु २० अर्ब ८० करोड, भदौमा रु २० अर्ब ७४ करोड तथा पुसमा रु २० अर्ब २० करोड राजस्व उठेको थियो।
वीरगञ्ज नाकाबाट चालु आर्थिक वर्षको ११ महिनामा रु ८ खर्ब ९० अर्ब ७ करोड बराबरका वस्तु तथा सामान आयात भएका छन्। गत वर्षको सोही अवधिमा आयातको मूल्य रु ७ खर्ब ७० अर्ब रहेको थियो। यसले आयात व्यापारमा उल्लेख्य वृद्धि भएको देखाएको छ।
निर्याततर्फ पनि सुधार देखिएको छ। चालु आवको ११ महिनामा वीरगञ्ज नाका हुँदै रु ९९ अर्ब ६६ करोड बराबरका वस्तु तथा सामान निर्यात भएका छन्। गत आर्थिक वर्षको सोही अवधिमा रु ९६ अर्ब ७२ करोड मूल्यका वस्तु निर्यात भएका थिए।
राजस्व सङ्कलन र आयात–निर्यात दुवैमा वृद्धि भए पनि वार्षिक लक्ष्य पूरा गर्न बाँकी एक महिनामा उल्लेख्य सङ्कलन आवश्यक पर्ने देखिएको छ। वीरगञ्ज भन्सार मुलुकको कुल भन्सार राजस्वमा सबैभन्दा ठूलो योगदान दिने कार्यालयमध्ये एक हो।
