नेपाल पूर्वाधार 
default
काठमाडौँ । मनसुन सक्रिय भएसँगै देशभरको मौसम निरन्तर परिवर्तनशील बनेको छ। कतै अत्यधिक गर्मी छ भने कतै लगातार वर्षा भइरहेको छ। वर्षासँगै नेपालका पहाडहरू हरियालीले ढाकिएका छन् र प्राकृतिक सौन्दर्य झन् मनमोहक बनेको छ।
यही मौसमका बीच काठमाडौँबाट कुलेखानी हुँदै देउराली भएर हेटौडा पुग्ने सडकखण्डमा यात्रा गर्नेहरूले केही मिनेटको अन्तरमै फरक-फरक मौसमको अनुभव गर्न सक्छन्। केही समयअघि घाम लागेको आकाश अचानक बाक्लो बादल र हुस्सुले ढाकिन्छ भने केहीबेरमै फेरि मौसम खुलेर वरिपरिका दृश्यहरू छर्लङ्ग देखिन थाल्छन्।
काठमाडौँ र हेटौडामा अहिले गर्मी महसुस भइरहे पनि यी दुई सहरलाई जोड्ने सडकको देउराली क्षेत्रमा भने मौसमको स्वरूप बिल्कुलै फरक देखिन्छ। कहिले हरिया डाँडाकाँडा, सुन्दर इन्द्रसरोवर (कुलेखानी) जलाशय र आसपासका रमणीय दृश्य स्पष्ट देखिन्छन् भने अर्को केही मिनेटमै बाक्लो हुस्सुले केही मिटर परसम्म पनि देख्न नसकिने अवस्था सिर्जना हुन्छ। यसरी घाम, बादल र हुस्सुको तीव्र परिवर्तनले यात्रुहरूलाई छोटो समयमै फरक-फरक मौसमको अनुभूति गराइरहेको छ।
काठमाडौँको बल्खुबाट करिब ४५ किलोमिटर दूरीमा रहेको देउराली काठमाडौँ-हेटौडा सडकखण्डको प्रमुख विश्रामस्थल पनि हो। यहाँ दैनिक रूपमा यात्रा गर्ने सवारीसाधनहरू खाना खान, चिया पिउन र केहीबेर आराम गर्न रोकिने गर्छन्। प्राकृतिक दृश्यावलोकनका लागि पनि यो स्थान यात्रुहरूको रोजाइमा पर्ने गरेको छ।
देउराली प्राकृतिक सौन्दर्यका लागि मात्र होइन, ऐतिहासिक महत्वका कारण पनि परिचित छ। आधुनिक सडक र यातायातको सुविधा विकास हुनुअघि मकवानपुरको धोर्सिङदेखि काठमाडौँको मातातीर्थसम्म सामान ढुवानी गर्न प्रयोग गरिएको नेपालको पहिलो रोप-वे यही क्षेत्रबाट सञ्चालनमा आएको थियो।
राणा प्रधानमन्त्री चन्द्र शम्शेरको पहलमा १९६३ सालमा अमेरिकी सरकारको सहयोगमा निर्माण गरिएको उक्त रोप-वेको इतिहास झल्काउने केही संरचनाहरू आज पनि देउराली क्षेत्रमा देख्न सकिन्छ। प्राकृतिक आकर्षणसँगै ऐतिहासिक सम्पदाको अनुभव गर्न सकिने भएकाले मनसुनको समयमा देउराली पुग्ने यात्रुहरूका लागि यो स्थान अझ विशेष बनेको छ।
तस्बिरहरू: नेपाल फोटो लाइब्रेरी
