नेपाल पूर्वाधार 
काठमाडौं। विशेष अदालतले पूर्वउपप्रधानमन्त्री तथा पूर्वअर्थमन्त्री विष्णुप्रसाद पौडेललाई सम्पत्ति शुद्धीकरणसम्बन्धी मुद्दामा थप तीन दिन हिरासतमा राखेर अनुसन्धान गर्न अनुमति दिएको छ।
विशेष अदालतका न्यायाधीशहरू नारायणप्रसाद पौडेल, हेमन्त रावल र उमेश कोइरालाको संयुक्त इजलासले आइतबार सम्पत्ति शुद्धीकरण अनुसन्धान विभागको मागअनुसार पौडेललाई दोस्रो पटक तीन दिन म्याद थप गर्दै अनुसन्धान अघि बढाउन अनुमति दिएको हो।
यसअघि विशेष अदालतले असार ८ गते पक्राउ परेका पौडेललाई सात दिन हिरासतमा राखेर अनुसन्धान गर्न अनुमति दिएको थियो। प्रारम्भिक अनुसन्धान पूरा नभएपछि विभागले पुनः म्याद थपका लागि अदालतमा निवेदन दिएको थियो।
विशेष अदालतको आदेशमा सम्पत्ति शुद्धीकरण मुद्दाको अनुसन्धानका क्रममा पक्राउ परेका आरोपित विष्णुप्रसाद पौडेललाई अनुसन्धान प्रयोजनका लागि विभागको अनुरोधअनुसार दोस्रो पटक तीन दिन म्याद थप गरिएको उल्लेख गरिएको छ।
नेकपा (एमाले) का उपाध्यक्षसमेत रहेका पौडेललाई असार ८ गते सुर्खेतबाट पक्राउ गरी काठमाडौं ल्याइएको थियो। त्यसयता उनी न्यायिक हिरासतमा रहँदै सम्पत्ति शुद्धीकरण अनुसन्धान विभागको अनुसन्धानको दायरामा छन्।
अनुसन्धान विभागले पौडेलमाथि सम्पत्ति शुद्धीकरणसम्बन्धी कानुन उल्लङ्घन भएको आशंकामा अनुसन्धान गरिरहेको छ। अनुसन्धान पूरा भएपछि विभागले प्राप्त प्रमाणका आधारमा मुद्दा दायर गर्ने वा अन्य कानुनी प्रक्रिया अघि बढाउने निर्णय गर्नेछ। अहिले भने अनुसन्धान प्रक्रिया जारी रहेकाले अदालतले थप तीन दिनको म्याद प्रदान गरेको हो।
