नेपाल पूर्वाधार 
म्याग्दी। म्याग्दीको धौलागिरि गाउँपालिका-७ स्थित ताकम र शिवाङमा पहिलोपटक सडक कालोपत्र गरिएको छ। दरवाङ-मुना-ढोरपाटन सडक योजनाअन्तर्गत बस्ती क्षेत्रका ९०० मिटर सडक प्रिमिक्स प्रविधिबाट कालोपत्र गरिएको हो।
पूर्वाधार विकास कार्यालय म्याग्दीका अनुसार कालोपत्रपछि स्थानीय बस्ती धुलो र हिलोमुक्त बनेको छ। धौलागिरि गाउँपालिकामा यसअघि कुनै पनि सडक कालोपत्र भएको थिएन।
बेनी-दरवाङ-धारापानी-ताकम-मुना-जलजला-ढोरपाटन सडकलाई मध्यपहाडी लोकमार्गको वैकल्पिक मार्गका रूपमा हेरिएको छ। धारापानीदेखि झिनडाँडा खण्डसम्म सडक स्तरोन्नतिको काम अन्तिम चरणमा पुगेको छ।
रणनीतिक महत्वको मानिएको यो सडक सञ्चालनमा आएपछि म्याग्दी, बागलुङ र पूर्वी रुकुमका बासिन्दालाई पोखरा-काठमाडौँ आवतजावतमा करिब ५० किलोमिटर दूरी छोटो पर्ने अपेक्षा गरिएको छ।
