नेपाल पूर्वाधार 
फाइल तस्बिर
काठमाडौँ । अमेरिकाका राष्ट्रपति Donald Trump ले इरानसँग दुई हप्ताका लागि युद्धविराम भएको घोषणा गरेका छन्। उनले सामाजिक सञ्जाल प्लेटफर्म ट्रुथ सोसलमार्फत इरानले होर्मुज स्ट्रेट तुरुन्त खोल्ने सर्तमा आक्रमण स्थगन गर्न सहमति भएको बताएका छन्।
ट्रम्पका अनुसार पाकिस्तानका प्रधानमन्त्री Shehbaz Sharif र सेना प्रमुख Asim Munir को पहलमा यो निर्णय भएको हो। उनले इरानबाट १० बुँदे प्रस्ताव प्राप्त भएको र विवादित विषयहरूमा सहमति जुटिसकेको उल्लेख गर्दै सम्झौतालाई अन्तिम रूप दिन थप दुई हप्ता लाग्ने बताए।
इरानले पनि युद्धविरामको पुष्टि गरेको छ। इरानको सर्वोच्च राष्ट्रिय सुरक्षा परिषद्ले थप वार्ता Islamabad मा हुने जनाएको छ। इरानले होर्मुज स्ट्रेट दुई हप्तासम्म खुला राख्ने घोषणा गर्दै नागरिकलाई राष्ट्रिय एकता कायम गर्न आह्वान गरेको छ।
मेहर समाचार एजेन्सीका अनुसार यो सहमति पाकिस्तानको मध्यस्थतामा भएको हो र यसलाई सर्वोच्च नेता Ayatollah Mojtaba Khamenei ले अनुमोदन गरेका छन्। इरानले उक्त सम्झौतालाई आफ्नो ‘विजय’ का रूपमा व्याख्या गरेको छ।
यसैबीच, इजरायल पनि दुई हप्ते युद्धविराममा सहमत भएको छ। ह्वाइट हाउसका एक अधिकारीका अनुसार यस अवधिमा इजरायलले पनि इरानमाथि आक्रमण नगर्नेछ।
यसअघि फेब्रुअरी २८ मा अमेरिका र इजरायलले संयुक्त हवाई आक्रमण गरी इरानका सर्वोच्च नेता Ali Khamenei लगायत शीर्ष अधिकारीको हत्या गरेपछि द्वन्द्व चर्किएको थियो। त्यसयता इरानका उच्च सैन्य तथा सुरक्षा अधिकारीहरू मारिएका छन्।
प्रत्युत्तरमा इरानले इजरायल र खाडी क्षेत्रमा रहेका अमेरिकी सैन्य अड्डाहरूलाई लक्षित गरी आक्रमण गर्दा द्वन्द्व मध्यपूर्वभरि फैलिएको थियो। हालसम्म विभिन्न देशमा गरी पाँच हजारभन्दा बढी मानिसको ज्यान गएको बताइएको छ।
